Exposición 60 aniversario do IOP-CIS (1963-2023)

Con motivo do 60 aniversario da creación do Instituto de Opinión Pública (IOP) – Centro de Investigacións Sociolóxicas (CIS), expónse unha pequena parte dos estudos e cuestionarios realizados polo organismo, que no seu conxunto constitúen un reflexo da historia do noso país vista a través da opinión pública española. Para dar idea da magnitude dos datos de opinión que custodia o IOP-CIS, cómpre salientar que só nos últimos 30 anos se realizaron máis de tres millóns de entrevistas.

Neste percorrido histórico móstranse as principais ferramentas utilizadas para poder realizar as primeiras enquisas, antes da introdución masiva dos ordenadores; como as máquinas perforadoras e clasificadoras de tarxetas de IBM, que foron amplamente utilizadas nos anos 70 do século XX para realizar operacións con fins de xestión, contabilidade e/ou estatísticos.

En relación coa actividade editorial do centro, orientada a dar publicidade aos estudos realizados e a contribuír ao desenvolvemento da socioloxía en España como disciplina científica, exhíbense os primeiros exemplares da Revista Española de la Opinión Pública (REOP), do Boletín do Instituto de Opinión Pública e os primeiros libros publicados. Tamén se mostra unha selección das últimas publicacións, entre as que destaca a obra de Harriet Martineau: Como observar a moral e os costumes, traducida por primeira vez ao castelán e que pode considerarse o primeiro tratado de metodoloxía na historia da Socioloxía. En conxunto, un labor editorial que fixo que o CIS realizase máis de 890 publicacións.